నిద్రలేమి ఖరీదు.. లక్ష కోట్ల డాలర్లు

Spread the love

Sleepless problems Make you Pay Crores Dollars

  • తాజా అధ్యయనంలో వెల్లడి

మనిషికి సరిపడా నిద్ర లేకపోతే ఏం జరుగుతుంది? అనారోగ్య సమస్యలు తలెత్తుతాయి. ఏ పనీ సక్రమంగా చేయలేడు. అంతే కదా? కాదండోయ్.. మనిషి నిద్రలేమి బోలెడంత ఆర్థిక నష్టానికి దారితీస్తోందని తేలింది.సరైన నిద్రలేకపోతే మనిషి ఆరోగ్యంగా ఉండలేడు. ఆరోగ్యంగా లేకపోతే సరిగా పనిచేయలేడు. దీంతో కంపెనీల ఉత్పాదకత తగ్గుతుంది. ఫలితంగా కోట్ల రూపాయల నష్టం వాటిల్లుతోంది. నిద్రలేమి కారణంగా ప్రపంచ వ్యాప్తంగా  ఏటా లక్ష కోట్ల డాలర్ల మేర నష్టపోతున్నట్లు తాజా సర్వేలో వెల్లడైంది. రాండ్‌ అనే ఓ సంస్థ 34 దేశాల్లో నిర్వహించిన సర్వేలో ఈ విషయం తెలిసింది. ఉద్యోగులపై ఎల్లవేళలా తీవ్రమైన పని ఒత్తిడి ఉంటోందని, అదే ఒత్తిడితో ఇంటికి వెళ్లడం.. అక్కడా పనిచేయడంతో సరిపడా నిద్ర ఉండటంలేదని ఆ సంస్థ వివరించింది. మరుసటి రోజు ఒత్తిడికి అదనంగా నిద్రలేమితో ఆఫీసుకు రావడం వల్ల సరిగా పనిచేయలేకపోతున్నారని పేర్కొంది. దీంతో ఆయా కంపెనీల ఉత్పాదక సామర్థ్యం తగ్గిపోయి, నష్టాలు వాటిల్లుతున్నాయని వెల్లడించింది. కాగా, నిద్రలేమి కారణంగా ఎక్కువగా నష్టపోతున్న దేశాల్లో అమెరికా ముందు ఉంది. ఏటా దాదాపు41,100 కోట్ల డాలర్లను అగ్రరాజ్యం నష్టపోతున్నట్లు తేలింది. ఇక 13,800 కోట్ల డాలర్ల నష్టంతో జపాన్‌ రెండో స్థానంలో ఉండగా.. తర్వాతి స్థానాల్లో జర్మనీ, యూకే, కెనడా ఉన్నాయి. ఇక ఎక్కువ ఉద్యోగులుండే భారత్,చైనాలో నిద్రలేమితో జరుగుతోన్న నష్టాన్ని ఇప్పటి వరకు ఎవరూ లెక్కించలేదు. నిద్రలేమితో కలుగుతోన్న నష్టాన్ని పూడ్చుకోవడానికి జపాన్‌లోని కొన్ని కంపెనీలు ఇప్పటికే చర్యలు మొదలుపెట్టాయి. ఇందులో భాగంగా ఉద్యోగులు కాసేపు కునుకు తీయడానికి ఆఫీసుల్లో ప్రత్యేకంగా ఏర్పాట్లు చేశాయి.

Leave a Reply

Your email address will not be published. Required fields are marked *