రాఖీకి వెళ్తుండగా ఘటన
రాఖీ పండుగ నాడు తెలంగాణ ఆర్టీసీ బస్సులో గర్భిణికి డెలివరీ చేసి ఒక మహిళా కండక్టర్ మానవత్వం చాటుకున్నారు. తాను విధులు నిర్వర్తిస్తోన్న బస్సులో గర్భిణికి పురిటి నొప్పులు రాగా, ఆమె వెంటనే స్పందించి బస్సులో ప్రయాణిస్తోన్న నర్సుతో కలిసి ప్రసవం చేశారు. అనంతరం తల్లీ బిడ్డను స్థానిక ఆస్పత్రికి తరలించారు.
గద్వాల డిపోకు చెందిన గద్వాల-వనపర్తి రూట్‌ పల్లె వెలుగు బస్సులో సోమవారం ఉదయం సంధ్య అనే గర్భిణి రక్షాబంధన్‌ సందర్భంగా తన సోదరులకు రాఖీ కట్టేందుకు వనపర్తికి వెళ్తున్నారు. బస్సు నాచహల్లి సమీపం లోకి రాగానే గర్బిణికి ఒక్కసారిగా పురిటి నొప్పులు వచ్చాయి.
వెంటనే అప్రమత్తమైన మహిళా కండక్టర్ జి. భారతి బస్సును ఆపించారు. అదే బస్సులో ప్రయాణిస్తోన్న ఒక నర్సు సాయంతో గర్భిణికి పురుడు పోశారు. పండంటి ఆడ‌బిడ్డ‌కు మ‌హిళ జ‌న్మ నిచ్చారు. అనంతరం 108 సాయంతో తల్లీ,బిడ్డను స్థానిక ఆస్పత్రికి తరలించారు. ప్ర‌స్తుతం తల్లీ,బిడ్డా ఇరువురు క్షేమంగా ఉన్నారు.
