ఐపీఎల్ షెడ్యూల్ వ‌చ్చేసింది

మార్చి 14 నుంచి ఐపీఎల్ 2025
మొత్తంగా 3 సీజన్ల షెడ్యూల్ రిలీజ్

వచ్చే ఏడాది ఐపీఎల్ సీజన్లకు సంబంధించి బీసీసీఐ షెడ్యూల్‌ను ప్రకటించింది. ఈ మేరకు అంతర్జాతీయ క్రికెట్ షెడ్యూల్‌తో ఐపీఎల్ షెడ్యూల్ క్లాష్ అవ్వకూడదనే ఉద్దేశంతో ఈ నిర్ణయం తీసుకున్నట్లు తెలిపింది. ఐపీఎల్ 2025 సీజన్ మార్చి 14న ప్రారంభమై.. మే 25న మగుస్తుందని వెల్లడించింది. ఐపీఎల్ 2026, ఐపీఎల్ 2027 షెడ్యూల్‌ను సైతం ఖరారు చేసింది. ఐపీఎల్ 2025 షెడ్యూల్‌కు సంబంధించిన వివరాలు ఇలా ఉన్నాయి.
ఓ పక్క బోర్డర్ గవాస్కర్ ట్రోఫీ.. మరోపక్క ఐపీఎల్ వేలంపై భారత క్రికెట్ ఫ్యాన్స్ దృష్టిసారిస్తే.. బీసీసీఐ మాత్రం మరో విషయంపై ఫోకస్ చేసింది. అనూహ్యంగా ఐపీఎల్-2025కి సంబంధించిన షెడ్యూల్‌ను ప్రకటించింది. అంతేకాకుండా ఐపీఎల్ 2026, ఐపీఎల్ 2027కి సంబంధించిన తేదీలను కూడా ఖరారు చేసింది. ఈ మేరకు బీసీసీఐ అధికారికంగా ప్రకటించిందని ప్రముఖ స్పోర్ట్స్ వెబ్‌సైట్ క్రిక్‌బజ్ తెలిపింది.

మార్చి 14న మొద‌లు
ఐపీఎల్ 2025 మార్చి 14న ప్రారంభం అవుతుందని వెల్లడించింది. మే 25న ఫైనల్ మ్యాచ్ జరగనున్నట్లు పేర్కొంది. ఇక ఐపీఎల్ 2026 మార్చి 15 నుంచి మే 31 వరకు.. ఐపీఎల్ 2027 మార్చి 14 నుంచి మే 30 వరకు జరుగుతుందని వెల్లడించింది. గత సీజన్ తరహాలోనే ఐపీఎల్-2025లోనూ 74 మ్యాచ్‌లు జరగనున్నాయి.
వాస్తవానికి బీసీసీఐ ఎప్పుడైనా.. ఐపీఎల్ షెడ్యూల్‌ను చివరి నిమిషంలో విడుదల చేసేది. అయితే ఈసారి మాత్రం ఆ ఆనవాయితీకి బీసీసీఐ చెక్ పెట్టింది. ఒకటి కాదు రెండు కాదు.. ఏకంగా మూడు సీజన్లకు సంబంధించిన షెడ్యూల్‌ను ప్రకటించింది. అయితే అంతర్జాతీయ క్రికెటర్లు పూర్తి స్థాయిలో అందుబాటులో ఉండేందుకు బీసీసీఐ ఈ నిర్ణయం తీసుకున్నట్లు తెలుస్తోంది. అంతర్జాతీయ క్రికెట్ షెడ్యూల్‌తో ఐపీఎల్ షెడ్యూల్ క్లాష్ కాకూడదనే బీసీసీఐ ఈ నిర్ణయం తీసుకున్నట్లు సమాచారం.

వేలం స్టార్ట్‌
ఇక ఐపీఎల్ 2024 వేలం ఈనెల 24, 25 తేదీల్లో జరగనున్న విషయం తెలిసిందే. అయితే ఈ వేలం కోసం ఇటీవల బీసీసీఐ షార్ట్ లిస్ట్ విడుదల చేసింది. అందులో ఇంగ్లాండ్ పేసర్ జోఫ్రా ఆర్చర్ పేరులేదు. కానీ అతడు వేలంలోకి అందుబాటులోకి వచ్చినట్లు బీసీసీఐ ప్రకటించింది. వేలంలో 575వ ఆటాడిగా అతడు జాయిన్ అవుతాడని పేర్కొంది. అంతేకాకుండా మరో ఇద్దరు ప్లేయర్లు కూడా వేలంకోసం తమ పేర్లను నమోదు చేసుకున్నట్లు తెలిపింది. అమెరికాకు చెందిన సౌరభ్ నేత్రవల్కర్, భారత్‌కు చెందిన హార్దిక్ తమోర్‌లు కూడా వేలంలో పాల్గొంటారని వెల్లడించింది.
కాగా ఐపీఎల్ 2025 మెగా వేలం సౌదీ అరేబియాలోని జెడ్డా వేదికగా నవంబర్ 24, 25వ తేదీల్లో జరగనుంది. భారత కాలమాన ప్రకారం మధ్యాహ్నం 3 గంటలకు ఈ మెగా వేలం ప్రారంభం కానుంది. ఈ వేలానికి మొత్తంగా 1574 మంది ఆటగాళ్లు తమ పేర్లను రిజిస్టర్ చేసుకోగా.. అందులో 574 మందిని బీసీసీఐ షార్ట్ లిస్ట్ చేసింది. మరో ముగ్గురిని అందులో చేర్చింది.