బాలీవుడ్‌.. టాలీవుడ్‌ ఇలా ఏ ఇండస్ట్రీ అయినా సరే ఇప్పటి సూపర్‌స్టార్లు ఒకప్పుడు చాలీ చాల‌ని ఇరుకు గ‌ది లేదా ఇంట్లో చాలా క‌ష్టంగా జీవ‌నం సాగించిన వారే. చాలా శ్ర‌మించి ఒక్కో మెట్టు ఎక్కి, అదృష్టం క‌లిసొచ్చి ఇప్పుడు ఈ స్థాయిని అందుకుని ఉండొచ్చు కానీ, వారిలో చాలామంది సిల్వ‌ర్ స్పూన్ నోట్లో పెట్టుకుని పుట్ట‌లేదు. వంద‌ల కోట్ల ఆస్తుల సంపాదించిన అమితాబ్ బ‌చ్చ‌న్, చిరంజీవి, ర‌జ‌నీకాంత్, సంజ‌య్ లీలా భ‌న్సాలీ వీరంతా ఆరంభ క‌ష్టాల‌ను ఎదుర్కొని పెద్ద స్థాయికి ఎదిగారు. అయితే కింగ్ ఖాన్ షారూఖ్ అందుకు భిన్న‌మైన వాడా? అత‌డు నోట్లో సిల్వ‌ర్ స్పూన్ తో పుట్టాడా? అంటే అలాంటిదేమీ లేదు. షారూఖ్ త‌న ఇంటిని రీడెవ‌ల‌ప్‌మెంట్ కోసం ఓ బిల్డ‌ర్ కి ఇచ్చాడు. ఈ సంద‌ర్భంగా అత‌డు బిల్డ‌ర్ కి ఇచ్చిన ఇంటి గురించి ఆరా తీయ‌గా, షాకిచ్చే విష‌యాలు తెలిసాయి. అత‌డు ఇప్పుడు కింగ్ ఖాన్ అయి ఉండొచ్చు. కానీ న‌టుడిగా ఆరంభంలో ఉన్న‌ప్పుడు త‌న భార్య గౌరీఖాన్ తో క‌లిసి చాలీ చాల‌ని 1బిహెచ్‌కే ఫ్లాట్‌లో నివాసం ఉన్నాడు. అతడి క‌ష్టం చూసి ఓ ప్ర‌ముఖ నిర్మాత విశాల‌మైన ఫ్లాట్ ఒక‌టి కొనిచ్చాడు. దానికోసం అత‌డు 40లక్షలు చెల్లించాడు. ఈ డ‌బ్బు కోసం షారూఖ్ అతడికి సినిమాలు చేస్తానని వాగ్ధానం చేసాడు. షారుఖ్ ఖాన్ ప్ర‌స్తుతం ముంబైలోని ఖ‌రీదైన బాంద్రా బాండ్ స్టాండ్ ఏరియాలో ఉన్న మ‌న్న‌త్ లో నివ‌శిస్తున్న సంగ‌తి తెలిసిందే. కానీ అత‌డు న‌టుడిగా ఎదిగే క్ర‌మంలో నివ‌శించిన ఇల్లు వేరు. అది కార్టర్ రోడ్ లో ఉన్న నివాసం అమృత్. ప్ర‌స్తుతం ఈ ఆస్తిని రీడెవ‌ల‌ప్ చేసేందుకు బిల్డ‌ర్ చేతికి ఇచ్చార‌ని తెలిసింది. ఈ భ‌వంతిలో ఖాన్ గతంలో ఆఫీస్ స్థలంగా ఉపయోగించిన టెర్రస్ ఫ్లాట్ కూడా ఉంది. స్క్వేర్ ఫీట్ ఇండియా ఈ వివ‌రాలు అందించింది. ఇటీవల 10 మంది బిల్డర్లు షారూఖ్ గతంలో నివ‌శించిన `అమృత్` భ‌వంతిని తిరిగి అభివృద్ధి చేయడానికి ఆసక్తి చూపించారు. వారిలో ఏడుగురు సొసైటీకి ప్రెజెంటేషన్లు కూడా ఇచ్చారు. మ‌రో వారంలో కమిటీ ఇద్దరు డెవలపర్‌లను ఖరారు చేసి, రీడెవ‌ల‌ప్ మెంట్ కి ఎవరు బాగా సరిపోతారో నిర్ణ‌యిస్తుంది. అస‌లు షారూఖ్ కి ఈ ఇల్లు ఎలా వచ్చింది? అంటే…. నటుడు-నిర్మాత వివేక్ వాస్వానీ వివ‌రాలందించారు. షారూఖ్ ఖాన్ వివాహం చేసుకునే వరకు వాస్వానీ ఇంట్లోనే నివసించార‌ట. గౌరీని వివాహం చేసుకున్న తర్వాత దేవ్‌దత్‌లోని తాజ్ ల్యాండ్స్ ఎండ్ పక్కన ఉన్న అజీజ్ మీర్జా యాజమాన్యంలోని ఖాళీ ఫ్లాట్‌కు దంప‌తులు మారారు. అయితే అజీజ్ ఆ తర్వాత వేరొక చోటికి షిఫ్ట‌య్యారు. పెళ్లి తర్వాత షారూఖ్ ఖాన్ – గౌరీ కొంతకాలం మౌంట్ మేరీలోని అసుదా కుత్రిలోని ఒక చిన్న 1RK ఫ్లాట్‌లో నివసించారని, కానీ ఆ ఇల్లు వారికి సరిపోలేదని వాస్వానీ తెలిపారు. ఈ సమయంలోఫిలింమేక‌ర్ ప్రేమ్ లాల్వానీ షారూఖ్‌కు ‘గుడ్డూ’ చిత్రంలో పాత్రను ఆఫర్ చేశాడు. షారుఖ్ ఫ్లాట్ కొనడానికి త‌న నిర్మాత ల‌ల్వానీని రూ.40 లక్షలు అడిగినట్లు తెలిసింది. బదులుగా సినిమా కోసం కాల్షీట్ల‌ను బ్లాక్ చేస్తానని హామీ ఇచ్చారు. లాల్వానీ షారూఖ్ కోరిక‌ను ఫుల్ ఫిల్ చేసాడు. అలా సింగిల్ బెడ్ రూమ్ నుంచి విశాల‌మైన ఇంటికి మారాక షారూఖ్ – గౌరీ దంప‌తుల‌కు చాలా క‌లిసొచ్చింది.
