మొదలైన అమెరికా అధ్యక్ష ఎన్నికల పోలింగ్
కాంగ్రెస్ ప్రతినిధుల సభకు జరుగుతోన్న ఎన్నికలు
ఎన్నికల్లో 9 మంది భారతీయ అమెరికన్లు పోటీ
అగ్రరాజ్యంలో జరుగుతోన్న అధ్యక్ష ఎన్నికలు ఉత్కంఠ రేపుతున్నాయి. ఈ ఎన్నికల్లో డెమొక్రాటిక్, రిపబ్లికన్ పార్టీల అభ్యర్థుల కమలా హ్యారిస్, డొనాల్డ్ ట్రంప్‌లు సర్వశక్తులూ ఒడ్డారు. అమెరికా భవిష్యత్తుకు ఇవి అత్యంత కీలకమైన ఎన్నికలని, సరైన నిర్ణయం తీసుకోవాలని అటు కమలా.. ఇటు ట్రంప్ ఇద్దరూ కోరడం గమనార్హం. అయితే, వీళ్లు ప్రకటన ఒకటే అయినా. వాటి వెనుక ఉన్న ఆంతర్యం మాత్రం వేరు. ఈ క్రమంలో ఎన్నికల ఫలితాలు ఆసక్తి రేపుతున్నాయి.
అమెరికాలో అధ్యక్ష ఎన్నికల పోలింగ్‌కు సర్వం సిద్ధమయ్యింది. డెమొక్రాటిక్ అభ్యర్ధి కమలా హ్యారిస్, రిపబ్లికన్ అభ్యర్ధి డొనాల్డ్ ట్రంప్‌ల మధ్య హోరాహోరీ పోరు నెలకుంది. కాగా, అధ్యక్ష ఎన్నికలతో పాటు పాటు ప్రతినిధుల సభకు కూడా పోలింగ్ జరగుతోంది. అమెరికా కాంగ్రెస్ ప్రతినిధుల సభ ఎన్నికల్లో పలువురు భారతీయులు తమ అదృష్టాన్ని పరీక్షించుకుంటున్నారు. మొత్తం 9 మంది భారతీయులు బరిలో ఉండగా.. వారిలో ఐదుగురు రెండోసారి విజయం కోసం ప్రయత్నిస్తున్నారు. మరో ముగ్గురు మాత్రం తొలిసారి ఎన్నికల్లో పోటీ చేస్తున్నారు.
వర్జీనియా నుంచి 38 ఏళ్ల సుహాస్ సుబ్రహ్మణ్యం బరిలో ఉన్నారు. వర్జీనియా 10వ కాంగ్రెషనల్ డిస్ట్రిక్ స్థానం నుంచి పోటీ చేస్తున్న ఆయనకు.. గెలుపు అవకాశాలు ఎక్కువగా ఉన్నాయి. ఒకవేళ, సుహాస్ విజయం సాధిస్తే తొలిసారి ఈ రాష్ట్రం నుంచి ఎన్నికైన భారతీయ అమెరికన్‌గా చరిత్ర సృష్టించనున్నారు. గతంలో ఆయన మాజీ అధ్యక్షుడు బరాక్‌ ఒబామాకు వైట్‌హౌస్‌లో సహాయకుడిగా పనిచేశారు.
ఇక, కాలిఫోర్నియాలోని 6వ కాంగ్రెషనల్ డిస్ట్రిక్ట్‌ నుంచి డాక్టర్‌ అమిబెరా (59) మరోసారి పోటీ పడుతున్నారు. ఆమె 2013 నుంచి ఈ స్థానంలో గెలుస్తూనే ఉండటం విశేషం. సుదీర్ఘకాలంగా అమెరికా కాంగ్రెస్‌కు ఎన్నకవుతోన్న భారతీయ అమెరికన్‌గా నిలిచారు. ఈసారి ప్రతినిధుల సభ్యలో డెమొక్రాట్లకు మెజార్టీ వస్తే.. అమికి కీలక పదవి దక్కే అవకాశం ఉంది. అటు, వాషింగ్టన్‌‌లోని 7వ కాంగ్రెషనల్ డిస్ట్రిక్ట్‌ నుంచి ప్రమీలా జయపాల్‌ బరిలో ఉండగా.. 2017 నుంచి ఆమె ఇక్కడ విజయం సాధిస్తూనే ఉన్నారు. డెమొక్రటిక్‌ పార్టీలో బలమైన నేతగా గుర్తింపు ఉంది.
అలాగే, ఇల్లినాయిస్ 7వ కాంగ్రెషనల్ డిస్ట్రిక్ట్‌ నుంచి రాజా కృష్ణమూర్తి మళ్లీ పోటీలో ఉన్నారు. ఆయన 2017 నుంచి ఇక్కడ విజయం సాధిస్తున్నారు. కాలిఫోర్నియా 7వ కాంగ్రెషనల్ డిస్ట్రిక్ట్‌ నుంచి బరిలో ఉన్న రో ఖన్నా కూడా గత ఏడేళ్ల నుంచి గెలుస్తూ ఉన్నారు. మిషిగాన్‌లోని 13వ కాంగ్రెషనల్ డిస్ట్రిక్ట్‌ నుంచి శ్రీ తానేదార్‌ పోటీచేస్తున్నారు. ఇల్లినాయిస్, మిషిగాన్, కాలిఫోర్నియాలో డెమొక్రాట్లకు మంచి పట్టు ఉంది. అరిజోనా స్టేట్‌ అసెంబ్లీలో వరుసగా 2018, 20, 22ల్లో విజయం సాధించిన డాక్టర్‌ అమిష్‌ షా ఈసారి ప్రతినిధుల సభలో తన అదృష్టాన్ని పరీక్షించుకుంటున్నారు. అరిజోనా తొలి కాంగ్రెషనల్ డిస్ట్రిక్ట్‌ నుంచి ఆయన పోటీపడుతున్నారు.
రిపబ్లికన్ పార్టీ తరఫున డాక్టర్‌ ప్రశాంత్‌ రెడ్డి కన్సాస్‌ 3వ కాంగ్రెషనల్ డిస్ట్రిక్ట్‌ నుంచి, డాక్టర్‌ రాకేశ్‌ మోహన్‌ న్యూజెర్సీ 3వ కాంగ్రెషనల్ డిస్ట్రిక్ట్‌ నుంచి ప్రతినిధుల సభ బరిలో ఉన్నారు. కాలిఫోర్నియా 29వ కాంగ్రెషనల్ డిస్ట్రిక్ట్‌ నుంచి 1957లో భారతీయ అమెరికన్ దలీప్ సింగ్ సంధూ మొదటిసారి గెలిచి ప్రతినిధుల సభలో అడుగుపెట్టారు. అక్కడ నుంచి ఆయన మొత్తం మూడుసార్లు గెలుపొందారు. ఆ తర్వాత 2005లో బాబీ జిందాల్‌ లూసియానా నుంచి విజయం సాధించారు. అనంతరం ఆయన రెండుసార్లు ఆ రాష్ట్ర గవర్నర్‌గా కూడా పనిచేశారు.
