- జూన్ 7వ తేదీ నుంచి 9వ తేదీ వరకు మూడు రోజుల పాటు
- అమెరికాలోని అట్లాంటలో సభల నిర్వహణ.
రోడ్లు, భవనాల శాఖ మంత్రి కోమటిరెడ్డి వెంకట్ రెడ్డికి ఆట సభలకు ఆహ్వానం అందింది. అమెరికాలో అత్యంత ప్రతిష్టాత్మకంగా నిర్వహించే ఆట (అమెరికన్ తెలుగు అసోసియేషన్) ద్వివార్షిక మహాసభలకు రావాలని మంత్రికి నిర్వాహకుల నుంచి ఆహ్వానం అందింది. అమెరికాలోని అట్లాంటలోని జార్జియా వరల్ కాంగ్రెస్ సెంటర్‌లో నిర్వహించే ఆట కన్వెన్షన్, యూత్ కాన్ఫరెన్స్ లో ముఖ్య అతిథిగా పాల్గొనాలని ఆట ప్రతినిధులు మంత్రిని కోరారు. ఈ మేరకు ఆట కన్వీనర్ పాశం కిరణ్‌రెడ్డి ఆహ్వాన లేఖను మంత్రికి అందించారు.
జూన్ 7వ తేదీ నుంచి 9వ తేదీ వరకు మూడు రోజుల పాటు అట్లాంట నగరంలో నిర్వహించే ఈ ఆట వేడుకల్లో అమెరికాలోని వివిధ రాష్ట్రాల నుంచి వచ్చే చిన్నారుల సంస్కృతిక కార్యక్రమాలతో పాటు యువత కోసం జాబ్ ఫెయిర్స్, ఎడ్యుకేషన్ సమ్మిట్స్, హెల్త్ క్యాంప్స్‌తో పాటుగా గ్రామీణ ప్రాంతాల్లోని ప్రభుత్వ పాఠశాల్లో డిజిటల్ క్లాస్ రూంల ఏర్పాటు, శానిటేషన్ వంటి మౌలిక వసతులు కల్పించేందుకు భవిష్యత్ కార్యాచరణ రూపొందిస్తామని ఆయన మంత్రికి వివరించారు.
అమెరికా దేశంలో ఆట వేదికగా తెలుగు భాష మాట్లాడేవారిని ఒక్కటిగా కలిపి ఉంచడంతో పాటు తెలుగు భాష, సంస్కృతిని పెంపొందిస్తున్నామని ఆయన మంత్రికి లేఖలో వివరించారు. తెలంగాణలో రోడ్లు, భవనాల నిర్మాణంలో వేగంగా నిర్ణయాలు తీసుకుంటూ రాష్ట్రంలో మౌలిక వసతుల కల్పనలో అవిశ్రాంతంగా శ్రమించడంతో పాటుగా సినిమా పరిశ్రమ అభివృద్ధికి విశేషంగా కృషి చేస్తున్న మంత్రి కోమటిరెడ్డి కుటుంబ సమేతంగా ఆట సమావేశాలకు వస్తే అది తెలుగువారికి మంచి సందేశం ఇస్తుందని ఆట ప్రతినిధులు తెలిపారు.
