హైదరాబాద్‌: నటుడు బాలకృష్ణ, దర్శకుడు బాబీ దర్శకత్వంలో ఓ సినిమా తెరకెక్కుతోన్న విషయం తెలిసిందే. సితార ఎంటర్‌టైన్‌మెంట్స్‌ పతాకంపై నాగవంశీ నిర్మిస్తున్నారు. NBK 109గా ఇది ప్రచారంలో ఉంది. తాజాగా ఈ సినిమా టైటిల్‌ను చిత్రబృందం ప్రకటించింది. ‘డాకు మహారాజ్‌’ అనే పేరు ఖరారు చేసింది. దీనికి సంబంధించిన టీజర్‌ విడుదల చేసింది.
‘‘ఈ కథ వెలుగుని పంచే దేవుళ్లది కాదు. చీకటిని శాసించే రాక్షసులది కాదు. ఆ రాక్షసులను ఆడించే రావణుడిదీ కాదు. ఈ కథ రాజ్యం లేకుండా యుద్ధం చేసిన ఒక రాజుది. గండ్ర గొడ్డలి పట్టిన యమధర్మరాజుది. మరణాన్నే వణికించిన మహారాజుది’’ అనే సంభాషణలతో టీజర్‌ మొదలైంది. ‘‘గుర్తుపట్టావా.. డాకు మహారాజ్‌’’ అంటూ బాలయ్య చెప్పే డైలాగ్స్‌, విజువల్స్‌ ఈలలు వేయించేలా ఉన్నాయి.
‘భగవంత్‌ కేసరి’ తర్వాత బాలకృష్ణ నటిస్తోన్న చిత్రమిది. పూర్తిస్థాయి ఫ్యామిలీ ఎంటర్‌టైనర్‌గా ఈ చిత్రం రానున్నట్లు సమాచారం. ఇందులో ఆయన క్లాసీ లుక్‌లో కనిపించనున్నారని టాక్‌ వినిపిస్తుంది. అలాగే దీనిలో పొలిటికల్‌ బ్యాక్‌డ్రాప్‌ నేపథ్యంలో ఫ్లాష్‌బ్యాక్‌ ఎపిసోడ్‌ ఉంటుందట. దీంతో అంచనాలు పెరిగాయి. భిన్న కాలాల్ని ప్రతిబింబించే కథతో రూపొందుతుండడం… ఆ కథ సాగే కాలానికి తగ్గట్టుగానే బాలకృష్ణ మూడు కోణాల్లో కనిపిస్తారని తెలుస్తోంది. ఆయన సరసన ముగ్గురు కథానాయికలు నటిస్తున్నట్టు సమాచారం. బాలీవుడ్‌కు చెందిన ఊర్వశీ రౌతేలా ఇందులో కీలకపాత్రలో కనిపించనున్నారు. మలయాళ చిత్ర పరిశ్రమకు చెందిన ఒక అగ్ర నటుడు ఇందులో నటిస్తున్నారంటూ ఇటీవల వార్తలు వచ్చాయి.
