- ప్రచారం చేసిన టాలీవుడ్‌ ప్రముఖులకు చిక్కులు
- రానా, విజయ్‌ దేవరకొండ, ప్రకాష్‌ రాజ్‌లపై కేసు
బెట్టింగ్ యాప్స్ వ్యవహారంలో మరో కీలక పరిణామం చోటుచేసుకుంది. ఆ యాప్‌లను ప్రమోట్‌ చేసిన వారిలో ఉన్న ప్రముఖ నటీనటులపై మియాపూర్‌ పోలీసులు కేసు నమోదు చేశారు. నటీనటులు, సోషల్‌ మీడియా ఇన్‌ప్లుయెన్సర్లు సహా మొత్తం 25 మంది ఈ జాబితాలో ఉన్నారు. సినీ ప్రముఖుల జాబితాలో రానా దగ్గుబాటి, విజయ్‌ దేవరకొండ, ప్రకాశ్‌రాజ్‌, మంచు లక్ష్మి, ప్రణీత, నిధి అగర్వాల్‌ ఉన్నారు. సోషల్‌ మీడియా ఇన్‌ప్లుయెన్సర్లలో అనన్య నాగళ్ల, సిరి హనుమంతు, శ్రీముఖి, వర్షిణి సౌందరరాజన్‌, వాసంతి కృష్ణన్‌, శోభా శెట్టి, అమృత చౌదరి, నయని పావని, నేహా పఠాన్‌, పండు, పద్మావతి, ఇమ్రాన్‌ఖాన్‌, విష్ణు ప్రియ, హర్ష సాయి, బయ్యా సన్నీ యాదవ్‌, యాంకర్‌ శ్యామల, టేస్టీ తేజ, రీతూ చౌదరి, బండారు సుప్రీత ఉన్నారు.
మియాపూర్‌ వాసి ప్రమోద్‌ శర్మ ఫిర్యాదు మేరకు పోలీసులు కేసు నమోదు చేశారు. దాదాపు 25 మందిపై సైబారాబాద్‌కి చెందిన మియాపుర్‌ పోలీసులు కేసు నమోదు చేశారు. బెట్టింగ్ యాప్స్ ప్రమోట్‌ చేసి యువతను చెడగొడుతున్నారని మియాపుర్‌కి చెందిన ప్రమోద్‌ శర్మ అనే వ్యక్తి పోలీసులకు ఫిర్యాదు చేశాడు. ఈ ప్రమోషన్లను అరికట్టేందుకు పోలీసులు కట్టుదిట్టమైన చర్యలు చేపట్టాలని కోరారు. ఫిర్యాదును స్వీకరించిన మియాపూర్‌ పోలీసులు.. బెట్టింగ్ యాప్స్ ప్రమోట్‌ చేసిన ప్రముఖ తెలుగు నటులు రానా దగ్గుబాటితో పాటు మంచు లఁ్‌మి, విజయ్‌ దేవరకొండ, ప్రకాశ్‌రాజ్‌, ప్రణీత, శ్రీముఖి, రీతూ చౌదరి, యాంకర్‌ శ్యామల, అనన్య నాగళ్ల తదితరులపై కేసు నమోదు చేశారు.
