ట్విట్టర్‌లో ట్రెండింగ్‌గా మారిన ఇరుపార్టీల ట్యాగ్‌లు
వీడియోలు పెడితే కేసులు పెడుతున్నారట. అందుకే బ్యాగ్ ఫొటో మాత్రమే పెడుతున్నాం! మిత్రులారా, మీరు కూడా మీ ఫేవరెట్ బ్యాగ్ ఫొటోను #BagMan హాష్ ట్యాగ్‌తో పోస్ట్ చేయండి అంటూ బిఆర్‌ఎస్ పార్టీ ఎక్స్ వేదికగా తాజాగా పోస్ట్ చేసింది. ఓటుకు నోటు కేసుపై సిఎం రేవంత్ రెడ్డికి వ్యతిరేకంగా బిఆర్‌ఎస్ తీవ్ర విమర్శలు చేసింది. అయితే, బిఆర్‌ఎస్ పిలుపుతో బ్యాగ్‌ట్యాగ్‌నకు సంబంధించిన హాష్‌ట్యాగ్ ట్విట్టర్‌లో ట్రెండింగ్‌గా మారింది. దీనిపై తెలంగాణ కాంగ్రెస్ బిఆర్‌ఎస్‌కు ఎక్స్ వేదికగా కౌంటర్ ఇచ్చింది. మహారాష్ట్ర రాజకీయాల కోసం మీరు తీసుకెళ్లిన బ్యాగ్ ఏది? అని టి కాంగ్రెస్ ప్రశ్నించింది. వందల కోట్ల డబ్బును తరలించిన గొనె సంచులు పాంహౌస్‌లో ఉన్నాయా? అని నిలదీసింది.
ఢిల్లీలో లిక్కర్ స్కాం కోసం కొనుగోలు కోసం మీ నాయకురాలు కవిత తీసుకెళ్లిన బ్యాగ్ ఏ కలర్? మీ నాయకుడు ఢిల్లీకి మోసే సంచులు ఏ కలర్? మీ రాజకీయ లబ్ధి కోసం వివిధ పార్టీలతో పొత్తు పెట్టుకున్నప్పుడు మీరు తీసుకెళ్లిన బ్యాగ్ మీకు గుర్తుందా? పాస్‌పోర్ట్‌ల కుంభకోణంలో మీ నాయకుడు పట్టుబడినప్పుడు పత్రాల కోసం ఏబ్యాగ్ వాడారు? మీ మిత్రుడు జగన్ ఎన్నికల ఖర్చు కోసం తెలంగాణ నుంచి ఎన్ని బ్యాగులు పంపారు? బ్యాగులు మోసే మీ నాయకుడు హరీష్ రావుకు, కెటిఆర్‌లకు తెలుసు, వారిని అడగండి బ్యాగుల గురించి చెబుతారు.
మీ నాయకురాలు కవిత బ్యాగులు మోసే బాల్క సుమన్‌ను అడగండి. ఎన్ని రకాల బ్యాగ్‌లు మోసాడో, వాటి రంగు, వాటి ధర అందులో వస్తువుల ధరతో సహా అన్ని వివరాలు చెబుతాడు. దుబాయ్ బుర్జులో మీరు దాచిన బ్యాగుల లెక్క ఎప్పుడు చెబుతారు? అని కాంగ్రెస్ పార్టీ తీవ్ర ప్రశ్నలు వేసింది. కాంగ్రెస్ పార్టీ ఇంకో ట్వీట్ చేస్తూ దొంగ పాస్ పోర్టుల తయారీ, మనుషుల అక్రమ రవాణా, పాస్‌పోర్ట్ బ్రోకర్ అనగానే మీకు ఠక్కున గుర్తొచ్చేదెవరో కింద కామెంట్ చేయండి. #PassportBroker హ్యాష్ టాగ్‌తో ట్వీట్ చేయండి అంటూ పోస్ట్ చేసింది. ఇలా ఒకరిపై ఒకరు ఆరోపణలు సందించుకుంటుండడం విశేషం.
