టీఎస్, న్యూస్ : పార్లమెంట్ ఎన్నికలకు ముందు.. ఢిల్లీ లిక్కర్ స్కామ్ కేసు మళ్లీ తెరపైకి వచ్చింది. ఈ కేసులో ఆరోపణలు ఎదుర్కొంటున్న ఎమెల్సీ కవితకు ఈసారి సీబీఐ నోటీసులు పంపింది. విచారణ కోసం ఈ నెల 26న ఢిల్లీలోని సీబీఐ ఆఫీసుకు రావాలని కోరింది. కాగా, సీబీఐ, ఈడీ కేసుల్లో ఆరోపణలు ఎదుర్కొంటున్న మహిళలను ఇంటి దగ్గరే విచారించేలా లేదా వీడియో కాన్ఫరెన్స్ ద్వారా విచారించేలా ఆదేశాలు ఇవ్వాలని ఇదివరకు కవిత సుప్రీంకోర్టులో పిటిషన్ వేశారు.
ఈ పిటిషన్‌పై విచారణ పెండింగ్‌లో ఉంది. సుప్రీంకోర్టు దీనిపై తీర్పు ప్రకటించాకే, కవిత ఢిల్లీలో విచారణకు రావాలా వద్దా అనేది నిర్ణయించుకుంటారు. ఐతే.. సుప్రీంకోర్టు ఎప్పుడు విచారణ పూర్తి చేస్తుంది, ఎప్పుడు తీర్పు ఇస్తుంది? అనేది క్లారిటీ లేదు. ఈ నేపథ్యంలోనే సీబీఐ నుంచి కవితకు మళ్లీ నోటీసులు అందాయి. నిజానికి, ఈ కేసులో ఇదివరకు మూడుసార్లు కవితకు ఈడీ అధికారులు నోటీసులు ఇచ్చారు. ఢిల్లీలో ఈడీ విచారణ చేపట్టిన సమయంలో కవితను అరెస్టు చేస్తారని ప్రచారం జరిగింది. ఈ క్రమంలో కవిత సుప్రీంకోర్టును ఆశ్రయించారు.
ఈడీ అధికారుల తీరుపై అభ్యంతరం చెప్పారు. కానీ, సుప్రీం కోర్టులో పిటిషన్ విచారణలో ఉన్నది. ఇలాంటి సమయంలో సీబీఐ మరోసారి కవితను విచారణకు పిలిచింది. ఆఫీస్కు పిలిచి ఈడీ విచారించగా.. అంతకు ముందు సీబీఐ అధికారులు కూడా కవిత ఇంటి దగ్గరే విచారించి, స్టేట్మెంట్ తీసుకున్నారు. కానీ, ఇప్పుడు ఢిల్లీలోని సీబీఐ కార్యాలయానికి విచారణకు రావాలని, ఈ నెల 26న విచారణ ఉందని సీబీఐ నోటీసులు పంపింది.
