- సవరించిన అంచనాల్లో వెలుగులోకి….
- గత ప్రభుత్వ హయాంలో ఎస్సీ సంక్షేమానికి కేటాయింపులు రూ. 21,072 కోట్లు
- ఖర్చు చేసింది రూ. 2,265 కోట్లు మాత్రమే
- ప్రాధాన్య రంగాలకు భారీ కోత పెట్టిన గత ప్రభుత్వం గుర్తించిన ఆర్థిక నిపుణులు
గత ఆర్థిక సంవత్సరంలో షెడ్యూల్ కులాల అభివృద్ధి కోసం రూ. 21,072 కోట్లు కేటాయింపులు చేసిన గత ప్రభుత్వం కేవలం రూ. 2,265 కోట్లు మాత్రమే ఖర్చు చేసింది. ఇక గృహ నిర్మాణానికి రూ. 13, 428 కోట్లు కేటాయించినా, ఖర్చు మాత్రం కేవలం రూ. 1,723 కోట్లు మాత్రమే చేసింది. ఇలా బడ్జెట్ అంచనాలను వాస్తవ కేటాయింపులకు మధ్య తీవ్ర వ్యత్యాసం ఉందని ఆర్థిక నిపుణులు పేర్కొంటున్నారు. ప్రస్తుతం రాష్ట్ర ప్రభుత్వం వార్షిక బడ్జెట్‌ను ప్రవేశపెట్టడంతో గత ప్రభుత్వం కేటాయింపులు, ప్రస్తుత ప్రభుత్వం కేటాయింపులపై ఆర్థిక విశ్లేషకులు తమ అభిప్రాయాలను పేర్కొన్నారు. ఈ నేపథ్యంలోనే గత ప్రభుత్వం బడ్జెట్‌లో నిధులను కేటాయించినా వాటిని మాత్రం ఖర్చు చేయలేదని ఆర్థిక నిపుణులు ఆగ్రహం వ్యక్తం చేస్తున్నారు.
2023, -24 ఆర్థిక సంవత్సరంలో రూ. 2,90,396 కోట్ల బడ్జెట్‌ను అంచనా వేయగా, సవరించిన అంచనాలు పరిశీలించగా రూ, 58,379 కోట్లు తగ్గడంతో రూ.2,32,017 కోట్లుగా ఉంది. దీంతో గత ప్రభుత్వ ప్రాధాన్యాలైన దళితబంధు, డబుల్ బెడ్ రూం ఇండ్ల కోసం కేటాయించిన నిధులకు భారీగా కోత విధించింది. ఈ మేరకు గృహ నిర్మాణానికి రూ. 13, 428 కోట్లు కేటాయించినా ఖర్చు మాత్రం కేవలం రూ. 1,723 కోట్లు మాత్రమే చేసింది. ఇలా ఒకటి రెండు మినహా అన్ని శాఖల పద్దుల్లో గత ప్రభుత్వం కోత విధించడం విశేషం. ఫలితంగా దాదాపు రూ.58 వేల కోట్ల పైచిలుకు బడ్జెట్ అంచనాల్లో కోత పడింది. దీంతో రెవెన్యూ వ్యవయం రూ. 2,11,685 కోట్లుగా ముందుగా అంచనా వేసిన ప్రభుత్వం కేవలం రూ. 1,69,141 కోట్లకే సవరించచుకోవాల్సి వచ్చింది. పెట్టుబడి వ్యవయం కూడా రూ.37,524 కోట్ల నుంచి రూ. 24,178 కోట్లకు తగ్గింది.
