తెలంగాణలో 10 వేల డ్రైవింగ్ లైసెన్సులు రద్దు
మద్యం సేవించి వాహనాలు నడిపిన వారికి రవాణా శాఖ తరపున షాక్‌ ఇచ్చారు. పోలీసుల కేసులతో వారందరి డ్రైవింగ్ లైసెన్స్లను రద్దు చేస్తూ నిర్ణయం తీసుకున్నారు. అంతేకాకుండాయ పదేపదే ట్రాఫిక్ నిబంధనలు ఉల్లంఘిస్తున్న వారిపైనా రవాణా శాఖ అధికారులు కొరడా ఝుళిపిస్తున్నారు. ఈ ఏడాది ఏప్రిల్ నుంచి నవంబర్ వరకు రాష్ట్ర వ్యాప్తంగా మొత్తం 10 వేల 113 మంది డ్రైవింగ్ లైసెన్స్లను 6 నెలల పాటు రద్దు చేశారు. రద్దు చేసిన లైసెన్స్ లలో 7దాదాపు 70 శాతం డ్రంక్ అండ్ డ్రైవ్ లో దొరికిన మందుబాబులదే అని పేర్కొన్నారు. మద్యం సేవించి వాహనాలను నడపడం చట్ట విరుద్ధం. మొదటి దొరికితే ఫైన్ వేసి కోర్టు ముందు హాజరుపర్చుతారు పోలీసులు. అయితే మూడోసారి కూడా మద్యం సేవించి పోలీసులకు చిక్కితే కోర్టు ఇచ్చిన ఆదేశాల మేరకు వారి లైసెన్స్ లను రద్దు చేస్తున్నారు అధికారులు.
70 శాతం మందు బాబులవే
రద్దు చేసిన డ్రైవింగ్ లైసెన్స్‌లలో 70 శాతం మందుబాబులవే ఉండగా.. మిగతా 30 శాతం ర్యాష్ డ్రైవింగ్, రాంగ్ రూట్ డ్రైవింగ్, హెవీ లోడ్ తో రోడ్లపై భారీ వాహనాలను నడుపుతూ పట్టుబడ్డ వాహనదారులవి ఉన్నాయి. అయితే గతంలో కంటే ఈసారి మద్యం సేవించి పోలీసులకు పట్టుబడుతున్న వారి సంఖ్య గణనీయంగా పెరిగిందని.. అందులో ఎక్కువ మంది మైనర్లు, యువత ఉండడం ఆందోళన కలిగించే అంశం అని ఆవేదన వ్యక్తం చేశారు. ఇదిలా ఉంటే.. ప్రతి ఏడాది ఏప్రిల్1 నుంచి మార్చి 31 వరకు ఒక సంవత్సరంగా పరిగణించి ఒకేసారి డ్రైవింగ్ లైసెన్స్లను అధికారులు రద్దు చేస్తూ ఉంటారు. కానీ, జాప్యం చేస్తున్నారనే విమర్శల నేపథ్యంలో ఈసారి అధికారులు కొత్త మార్గాన్ని ఎంచుకున్నారు. ఏడాది వరకు ఆగకుండా మార్చి నుంచి 8 నెలల కాలానికి సంబంధించిన డ్రైవింగ్ లైసెన్స్ లను రద్దు చేస్తూ అధికారులు కీలక నిర్ణయం తీసుకున్నారు.
