ప్లాట్‌ఫాంపై స్క్రీన్‌ డోర్లు
ప్రయాణికుల వెహికల్స్ కోసం ప్రత్యేక పార్కింగ్ స్థలాలు
హైదరాబాద్ మెట్రో సెకండ్ ఫేజ్ డీపీఆర్
హైదరాబాద్ మెట్రో సెకండ్ ఫేజ్‌లో ప్రయాణికులకు సరికొత్త ప్రయాణ అనుభూతి కలగనుంది. ఈసారి ఫోర్త్ జనరేషన్ కోచ్‌లు వాడనున్నారు. డ్రైవర్ లేకుండానే ట్రైన్లు పరుగులు పెట్టనుండగా.. కమాండ్ కంట్రోల్ నుంచి ఆటోమెటిక్‌గా ఆపరేట్ చేయనున్నారు. ఇక ప్రయాణికుల భద్రత కోసం, ట్రాక్‌లపై ఎవరూ పడిపోకుండా ప్లాట్‌ఫాంపై స్క్రీన్‌ డోర్లు ఏర్పాటు చేయనున్నారు. హైదరాబాద్ మెట్రో నగర ప్రయాణికులకు మెరుగైన, సౌకర్యవంతమైన ప్రయాణం అందిస్తున్న సంగతి తెలిసిందే. ప్రస్తుతం 3 కారిడార్లలో మెట్రో సేవలు అందుబాటులో ఉన్నాయి. రోజుకు 5 లక్షల మంది ప్రయాణికులు తమ గమ్యస్థానాలకు రాకపోకలు సాగిస్తున్నారు. తెలంగాణ ప్రభుత్వం మెట్రో సెకండ్ ఫేజ్ నిర్మాణానికి సైతం సిద్ధమైంది. రాయదుర్గం – కోకాపేట్, ఎంజీబీఎస్ – చాంద్రాయణగుట్ట, నాగోల్ – శంషాబాద్, ఎల్‌బీనగర్ – హయత్ నగర్, మియాపూర్ – పటాన్‌చెరు మార్గాల్లో మొత్తం 76.4 కిలోమీటర్ల మేరకు విస్తరణ చేపట్టాలని ఇటీవల తెలంగాణ కేబినెట్ డీపీఆర్‌కు ఆమోదముద్ర వేసింది.
ఇక మెట్రో సెకండ్ ఫేజ్ ప్రాజెక్టులో ప్రయాణికులకు సరికొత్త ప్రయాణ అనుభూతిని అందించేందుకు సిద్ధమవుతున్నారు. ప్రస్తుతం థర్డ్ జనరేషన్ కోచ్‌లు వాడుతుండగా.. సెకండ్ ఫేజ్‌లో ఫోర్త్ జనరేషన్ కోచ్‌లు ఉపయోగించాలని నిర్ణయం తీసుకున్నారు. ప్రయాణికుల భద్రత కోసం ప్లాట్‌ఫాంపై స్క్రీన్‌ డోర్లు ఏర్పాటు చేయనున్నారు. స్టేషన్ల వద్ద ఎకరం విస్తీర్ణంలో పార్కింగ్ ఏర్పాట్లు వంటివాటిని తాజా డీపీఆర్‌లో ప్రతిపాదించారు.
సెకండ్ ఫేజ్‌లో మెుత్తం 5 కారిడార్లలో రూ.24,269 కోట్ల వ్యయంతో పనులు చేపట్టనున్నారు. ఫోర్త్ జనరేషన్ కోచ్‌లతో డ్రైవర్ లేకుండానే మెట్రో పరుగులు పెట్టనుంది. కమాండ్ కంట్రోల్ సెంటర్‌ నుంచి ఆటోమేటిక్‌గా ఈ ట్రైన్లు నడపనున్నారు. కొత్త కోచ్‌లు మరింత అద్భుతంగా, అధునాతనంగా ఉండనున్నాయి. ఢిల్లీ, చెన్నై మెట్రోల తరహాలో.. ప్రయాణికుల భద్రత కోసం ఫ్లాట్‌ఫాంపై స్క్రీన్‌ డోర్లు (పీఎస్‌డీ) ఏర్పాటు చేయనున్నారు.
యు గిడ్డర్ విధానంలో ట్రాక్ పనులు
ఇక సెకండ్ ఫేజ్‌లో ఖర్చు తగ్గించేందుకు ‘యు’ గిడ్డర్ విధానంలో ట్రాక్ పనులు చేపట్టనున్నారు. ఫస్ట్ ఫేజ్‌లో దుకాణాలు, వాణిజ్య అసరాల కోసం రెండు అంతస్తుల్లో మెట్రో స్టేషన్లు నిర్మించారు. రెండో ఫేజ్‌లో మాత్రం ఒక అంతస్తులోనే స్టేషన్‌ చిన్నగా నిర్మించనున్నారు. జంక్షన్‌ స్టేషన్లు మాత్రమే రెండు అంతస్తుల్లో ఉండనున్నాయి. ప్రస్తుతం పలు మెట్రో స్టేషన్లలో పార్కింగ్ సదుపాయం లేక ప్రయాణికులు ఇబ్బందులు పడుతున్నారు. ఈ దశలో ఆ తిప్పలు ఉండవ్. ప్రతి స్టేషన్‌ సమీపంలో ఎకరం ప్రభుత్వ స్థలంలో పార్కింగ్ ఏర్పాటు చేయనున్నారు. దాంతో పాటుగా ప్రతి కారిడార్‌కు ప్రత్యేకంగా డిపో ఏర్పాటు చేయనున్నారు. ఈ మేరకు అధికారులు డీపీఆర్ సిద్ధం చేశారు. కేంద్రానికి డీపీఆర్ పంపి ఆమోదం తర్వాత పనులు చేపట్టనున్నారు.
