కుంభమేళాకు వెళ్లొస్తుండగా ఘోర ప్రమాదం హైదరాబాద్​కు చెందిన ఏడుగురు దుర్మరణం

మధ్యప్రదేశ్‌లో జరిగిన ఘోర రోడ్డు ప్రమాదంలో తెలంగాణకు చెందిన ఏడుగురు మృతి చెందగా, మరికొంత మందికి గాయాలయ్యాయి. జబల్‌పూర్‌ వద్ద మినీ బస్సు, ట్రక్కు ఢీకొని ప్రమాదం జరిగింది. కుంభమేళాకు వెళ్లి తిరిగి వస్తుండగా ఈ ఘోర రోడ్డు ప్రమాదం సంభవించింది. మృతులంతా హైదరాబాద్‌ నాచారం వాసులుగా గుర్తించారు. మినీ బస్సు రిజిస్ట్రేషన్‌ ఆధారంగా తొలుత ఏపీ వాసులుగా అక్కడి పోలీసులు భావించారు. ఆ తర్వాత మృతదేహాల వద్ద దొరికిన ఆధారాలతో నాచారం వాసులుగా గుర్తించారు. ఈ ప్రమాదంలో మినీ బస్సులోనే పలువురు భక్తులు చిక్కుకుపోయారు. బస్సులో ఇరుక్కున్న వారిని స్థానికులు బయటకు తీశారు. ప్రమాదానికి గురైన మినీ బస్సు నెం. AP 29 W 1525గా తెలిపారు. క్షతగాత్రులను మధ్యప్రదేశ్‌ సిహోరాలోని ఆసుపత్రికి తరలించారు. మృతులు నవీన్, బాలకృష్ణ, సంతోష్, శశికాంత్, రవి, ఆనంద్, మల్లారెడ్డి గా గుర్తించారు.
తెలంగాణలోని హైదరాబాద్ నుంచి ఆధ్యాత్మిక వేడుక మహా కుంభమేళాకు ఓ మినీ బస్సులో కొందరు భక్తులు వెళ్లారు. ప్రయాగ్ రాజ్ నుంచి భక్తులు తిరిగి వస్తున్న సమయంలో వారు ప్రయాణిస్తున్న మినీ బస్సు ప్రమాదానికి గురైంది. మధ్యప్రదేశ్ ప్రభుత్వం, అధికారులతో మాట్లాడి గాయపడిన వారికి అన్ని విధాలుగా సాయం అందేలా చూడాలని అధికారులను సీఎం చంద్రబాబు ఆదేశించారు. ఏడుగురు చనిపోయారని అందిన వార్తపై ఆయన తీవ్ర ఆవేదన వ్యక్తం చేశారు. ప్రస్తుతం ఆ ప్రయాణికుల పరిస్థితి, వారికి అందుతున్న సాయంపై తనకు ఎప్పటికప్పుడు నివేదించాలని అధికారులను చంద్రబాబు ఆదేశించారు.
హైదరాబాద్ లోని నాచారానికి చెందిన కొందరు భక్తులు 144 ఏళ్లకు జరుగుతున్న మహా కుంభమేళాకు వెళ్లారు. ప్రయాగ్ రాజ్ లోని త్రివేణి సంగమంలో ఏపీ వాసులు పుణ్యస్నానాలు ఆచరించారు. అక్కడి పూజలు చేసిన అనంతరం, పర్యాటక ప్రదేశాలు దర్శించుకుని తెలంగాణకు తిరుగు ప్రయాణమయ్యారు. ఈ క్రమంలో మధ్యప్రదేశ్ లోని జబల్‌పూర్ జిల్లాలోని NH-30పై సిహోరా సమీపంలో భారీ రోడ్డు ప్రమాదం జరిగింది. భక్తులు ప్రయాణిస్తున్న మినీ బస్సును ఓ ట్రక్కు ఢీకొట్టడంతో విషాదం నెలకొంది. ఈ ఘటనలో హైదరాబాద్‌కు చెందిన భక్తులు ఏడుగురు మృతిచెందగా, మరికొందరు గాయపడ్డారు. వారిని సమీపంలోని ఆసుపత్రికి తరలించి చికిత్స అందిస్తున్నారు. సమాచారం అందగానే జబల్‌పూర్ కలెక్టర్, జిల్లా ఎస్పీ ఉన్నతాధికారులతో కలిసి ప్రమాదం జరిగిన ప్రదేశానికి వెళ్లి పరిశీలించారు. ఈ రోడ్డు ప్రమాదం వల్ల సిహోరా బైపాస్ వద్ద 10, 15 కిలోమీటర్ల మేర ట్రాఫిక్ జామ్ కావడంతో వేల వాహనాలు రోడ్డు మీద నిలిచిపోయాయి.