రాజ్యసభకు ఆర్‌ కృష్ణయ్య రాజీనామా ఆమోదించిన చైర్మన్‌
బీసీ సంక్షేమ సంఘం జాతీయ అధ్యక్షుడు, ఏపీ రాజ్యసభ సభ్యుడు ఆర్‌ కృష్ణయ్య తన రాజ్యసభ సభ్యత్వానికి రాజీనామా చేశారు. నిన్న రాజీనామాను సమర్పించగా రాజ్యసభ చైర్మన్‌ మంగళవారం ఆమోదించారు. వైసీపీ నుంచి రాజ్యసభకు ఎన్నికైన కృష్ణయ్య తన పదవికాలం మరో నాలుగేళ్ల పాటు ఉండగానే తన పదవికి రాజీనామా చేశారు. ఇప్పటికే రాజ్యసభ సభ్యత్వాలకు బీద మస్తాన్‌రావు, మోపిదేవి వెంకటరమణ రాజీనామా చేశారు.
2024లో జరిగిన ఎన్నికల్లో వైసీపీ అధికారం కోల్పోయిన తరువాత ఆ పార్టీకి చెందిన పలువురు కీలక నాయకులు రాజీనామా బాట పట్టారు. అదేవిధంగా రాష్ట్రంలోని ఎమ్మెల్సీలు, పలు మున్సిపాలిటీలు, కార్పొరేషన్‌లకు చెందిన చైర్మన్లు, మేయర్‌లు సైతం వైసీపీకి రాజీనామా చేసి అధికార టీడీపీ, జనసేన పార్టీలో చేరారు.
2019లో వైసీపీ అధికారంలోకి వచ్చిన తరువాత జరిగిన రాజ్యసభ ఎన్నికల్లో 11 స్థానాలకు గాను 11 స్థానాలను వైసీపీ గెలుచుకుని సంఖ్యాబలం పరంగా రాజ్యసభలో నాలుగో అతిపెద్ద పార్టీగా నిలిచింది. కృష్ణయ్య రాజీనామాతో వైసీపీకి మరో గట్టి షాక్‌ తగిలినట్లయ్యింది.
