రాష్ట్రంలో రాజకీయ పరిణామాలు మారుతున్నాయి. సొంతపార్టీలో అసంతృప్తివాదులు ఉండటంతో సీఎం రేవంత్ ప్రత్యామ్నాయ రక్షణ ఏర్పాట్లలో సిద్ధమవుతున్నారు. ఎందుకంటే ఇప్పటికే కొంతమంది సీనియర్లు అటు బీఆర్ఎస్తో అంటకాగుతున్నట్లు ప్రచారం జరుగుతున్నది. ఇలాంటి సమయంలో ఒకవేళ ప్రభుత్వానికి ఏదైనా కష్టం ఎదురైతే.. ప్రత్యామ్నాయ మద్దతు కోసం రేవంత్ ప్రయత్నాలు సాగిస్తున్నట్లు తెలుస్తున్నది. దీనిలో భాగంగానే మంగళవారం ఎంఐఎం ఎమ్మెల్యేలతో ప్రత్యేకంగా సమావేశమయ్యారు. గ్రేటర్ అభివృద్ధి కోసం అంటూ బయటకు చెప్తున్నా.. అంతర్గతంగా మాత్రం మద్దతుపైనే చర్చించినట్లు తెలుస్తున్నది.నిజానికి, సీఎం రేవంత్ ఇప్పటికే ఎంఐఎంను బుట్టలో వేసుకునేందుకు చాలా ప్రయత్నాలు చేస్తున్నారు. సీనియర్లను కాదని అక్బరుద్దీన్ను ప్రొటెం స్పీకర్గా నియమించారు. దీన్ని బీజేపీ విమర్శించినా..కాంగ్రెస్ ఏమాత్రం తగ్గలేదు.
మద్దతు ముఖ్యం
ప్రస్తుతం కాంగ్రెస్ ప్రభుత్వానికి ఉన్న బలం 64 మంది. సీపీఎం మద్దతుతో ఉన్నది. మెజార్టీకి ఎక్కువ ఉన్న సంఖ్యాబలం ఐదుగురు. దీంతో ప్రభుత్వం ఏర్పాటు అయినా ఇంకా అనుమానాలు వస్తూనే ఉన్నాయి. బీఆర్ఎస్, బీజేపీ, ఎంఐంఎ కలిసి, కాంగ్రెస్లో కేసీఆర్ సామాజికవర్గాన్ని బయటకు లాగి ప్రభుత్వాన్ని ఏర్పాటు చేస్తారనే ప్రచారం జరుగుతున్నది. దీనితోడు ఇటీవల రాజాసింగ్, కడియం శ్రీహరి, పల్లా రాజేశ్వర్రెడ్డి సైతం కీలకమైన విషయాలు మాట్లాడారు. కాంగ్రెస్ప్రభుత్వం ఆరు నెలలు లేదా ఏడాదిలో కూలిపోతుందని వ్యాఖ్యానించారు. ఈ వాఖ్యలు ఎలా ఉన్నా.. కాంగ్రెస్లో మాత్రం కొంత ఆసక్తిని పెంచాయి. ఇదే సమయంలో రేవంత్రెడ్డి కి వ్యతిరేకవర్గం సొంత పార్టీలో ఉంది. ఇలాంటి పరిస్థితుల్లో ప్రత్యామ్నాయ రాజకీయ ఏర్పాట్లకు సిద్ధమవుతున్నట్లు స్పష్టమవుతున్నది. అందుకే ఎంఐఎంను కలుపుకునేందుకు రేవంత్ విశ్వ ప్రయత్నాలు చేస్తున్నారు. తాజాగా ఏడుగురు ఎమ్మెల్యేలతో భేటీ అయ్యారు. ఈ భేటీలో మద్దతు అంశాలే కీలకంగా చర్చించారని టాక్.
