పరీక్షలో ఎక్కువ మార్కులు వచ్చిన టాపర్‌ను చైర్మన్ చేయడం సాహసోపేతమైన నిర్ణయం
ఇది సమకాలిన రాజకీయాల్లో నూతన ఒరవడికి నాంది పలికింది
రోడ్లు, భవనాల శాఖ మంత్రి కోటిమరెడ్డి వెంకట్ రెడ్డి
మద్నూర్ మార్కెట్ కమిటీ చైర్మన్ సౌజన్య అందరికి ఆదర్శమని, నూతన ఒరవడికి శ్రీకారం చుట్టిందని రోడ్లు, భవనాల శాఖ మంత్రి కోటిమరెడ్డి వెంకట్ రెడ్డి ప్రశంసించారు. పరీక్షలో పాసై మద్నూర్ మార్కెట్ కమిటీ చైర్మన్ అయిన అయిల్వార్ సౌజన్య పేరు రాష్ట్ర చరిత్రలో నిలిచిపోతుందని మంత్రి కోమటిరెడ్డి వెంకట్ రెడ్డి తెలిపారు. బుధవారం మంత్రుల నివాస సముదాయంలో జుక్కల్ ఎమ్మెల్యే తోట లక్ష్మీకాంతరావుతో కలిసి కామారెడ్డి జిల్లా, మద్నూర్ మార్కెట్ చైర్మన్‌గా సౌజన్య ఎన్నికైన సందర్భంగా మంత్రిని కలిసి అయిల్వార్ సౌజన్య ఆశీర్వాదం తీసుకున్నారు.
ఈ సందర్భంగా మంత్రి కోమటిరెడ్డి వెంకట్ రెడ్డి ఆమెను అభినందించారు. రాజకీయాల్లో ఎక్కడో ఒక చోట మార్పు మొదలు కావాలని, అది సౌజన్య నుంచే మొదలైందని, అందరూ ఈ విధానాన్ని పాటిస్తే ప్రజలకు జవాబుదారీగా ఉండొచ్చని ఆయన అన్నారు. సాధారణంగా రాష్ట్రంలో ఏ మార్కెట్ కమిటీ చైర్మన్ ఎన్నిక అయినా.. స్థానిక ఎమ్మెల్యేనో, మంత్రో సిఫారసు చేస్తారని, కానీ, పరీక్షలు నిర్వహించి ప్రతిభ కలిగిన వాళ్లు, చదువుకున్న వాళ్లు చైర్మన్ కావాలని జుక్కల్ ఎమ్మెల్యే తోట లక్ష్మీకాంతరావు మంచి ప్రయత్నం చేశారని మంత్రి కోమటిరెడ్డి వెంకట్ రెడ్డి అభినందించారు.
నలుగురు వలంటీర్లతో ఒక పర్యవేక్షక కమిటీని
మూడు మండలాల కాంగ్రెస్ అధ్యక్షులు, ముగ్గురు సీనియర్ లీడర్లతో కలిపి మార్కెట్ కమిటీ చైర్మన్ ఎన్నికకు కమిటీ వేసి, ప్రశ్నపత్రం రూపొందించి అందులో ఎక్కువ మార్కులు వచ్చిన టాపర్‌ను చైర్మన్ చేయడం సాహసోపేతమైన నిర్ణయమని, ఇది సమకాలిన రాజకీయాల్లో ఒక నూతన ఒరవడికి నాంది పలుకుతుందని మంత్రి కోమటిరెడ్డి ఆశాభావం వ్యక్తం చేశారు. ప్రతి ఎమ్మెల్యే ఇదే విధంగా ప్రయత్నిస్తే రైతులకు మరింత మెరుగైన సేవలు అందే అవకాశం ఉందని మంత్రి స్పష్టం చేశారు.
అంతేకాదు, గ్రామంలో, పంచాయితీ నిధులు దుర్వినియోగం కాకుండా గ్రామంలో నలుగురు వలంటీర్లతో ఒక పర్యవేక్షక కమిటీని ఏర్పాటు చేసి అభివృద్ధి నిధులు పక్కదారి పట్టకుండా మంచి ప్రయత్నం చేస్తున్నారని ఎమ్మెల్యే లక్ష్మీకాంతరావు ను మంత్రి కోమటిరెడ్డి వెంకట్ రెడ్డి కొనియాడారు. రాజకీయాల్లో పారదర్శకత, జవాబుదారితనం లేకపోవడంతో దేశం వెనకబాటుకు గురవుతుందని, విద్య పెరిగిన ఈ రోజుల్లో ఇటువంటి ప్రయత్నాలు కారు చీకటిలో వెలుగుదివ్వెలుగా సమాజానికి మంచి సందేశం ఇస్తాయని ఆయన ప్రశంసించారు.
