రూ. 1350 కోట్ల బిల్లులు పెండింగ్​

• రూ. 1350 కోట్ల బిల్లులు పెండింగ్​

• జీహెచ్​ఎంసీలో బంద్​కు పిలుపునిచ్చిన కాంట్రాక్టర్లు

జీహెచ్​ఎంసీలో బిల్లులు పేరుకుపోయాయి. దీంతో జీహెచ్​ఎంసీ కాంట్రాక్టర్లు పోరుకు దిగుతున్నారు. ఇప్పటి వరకు ఉన్న బకాయిలను చెల్లిస్తేనే పనులు చేస్తామంటూ తెగేసి చెబుతున్నారు. ప్రస్తుతం ప్రకటించిన పనులకు టెండర్లు దాఖలు చేయమని అల్టిమేటం జారీ చేశారు. ఈ నెల 18 నుంచి బంద్​ పాటిస్తున్నామని, మూకుమ్మడిగా బంద్​ లోకి వెళ్తున్నట్లు ప్రకటించారు.

జీహెచ్​ఎంసీలో ఇప్పటి వరకు రూ. 1350 కోట్లు పెండింగ్​లో ఉన్నాయి. వివిధ పనులు చేసిన కాంట్రాక్టర్లకు టోకెన్లు ఇచ్చినా బిల్లులు విడుదల చేయడం లేదు. దాదాపుగా ఆరు నెలల నుంచి రూపాయి చెల్లింపులు లేవు. ఇప్పటికే దీనిపై కౌన్సిల్​ మీటింగ్​లోనూ ఆందోళనకు దిగారు. కాంట్రాక్టర్లకు బిల్లులు చెల్లించాలని ఇటీవల బీజేపీ కార్పొరేటర్లు డిమాండ్​ చేశారు. అయితే, జీహెచ్​ఎంసీ ఖజానాలో డబ్బులు లేవని బిల్లులు ఇవ్వడం లేదు. ఈ నేపథ్యంలోనే కాంట్రాక్టర్లు బంద్​కు వెళ్తున్నట్లు ప్రకటించారు. అంతేకాకుండా ప్రస్తుతం రూ. 320 కోట్ల పనులకు టెండర్లు వేయాల్సి ఉంది. వాటికి టెండర్లు వేయమంటూ కాంట్రాక్టర్లు మూకుమ్మడిగా నిర్ణయం తీసుకున్నారు.