రాష్ట్ర కాంగ్రెస్ వ్యవహారాల ఇంచార్జీ దీపాదాస్ మున్షీ,
అమెరికన్ కాన్సులెట్ ప్రతినిధి జెన్నిఫర్ ఎ. లార్సన్‌లు అమ్మవారికి బోనం సమర్పణ
రాష్ట్ర కాంగ్రెస్ వ్యవహారాల ఇంచార్జీ దీపాదాస్ మున్షీ, అమెరికన్ కాన్సులెట్ ప్రతినిధి జెన్నిఫర్ ఎ. లార్సన్ సికింద్రాబాద్ ఉజ్జయిని మహంకాళి అమ్మవారిని దర్శించుకున్నారు. శనివారం అమ్మవారి ఆలయంలోకి మంత్రి పొన్నం ప్రభాకర్ వారిని ఆహ్వానించారు. ఈ సందర్భంగా దీపాదాస్ మున్షీ ఉజ్జయిని మహంకాళి అమ్మవారికి బోనాన్ని సమర్పించారు. అనంతరం ఉజ్జయిని మహంకాళి అమ్మవారి ఆశీస్సులు తీసుకున్నారు. ఈ సందర్భంగా దీపాదాస్ మున్షీ మాట్లాడుతూ తెలంగాణ సంప్రదాయాల్లో జరుపుకునే గొప్ప పండుగ బోనాలకు ప్రత్యేక స్థానం ఉందన్నారు. తెలంగాణ ప్రజలు సుఖశాంతులతో పాడిపంటలతో ఆయురారోగ్యాలతో ఉండాలని ఆమె ఆకాంక్షించారు.
కొన్ని సంవత్సరాలుగా కొనసాగుతున్న ఈ పండుగ పరంపర ఎంతో గొప్పదని, ప్రతి కుటుంబం అమ్మవారి ఆశీస్సులతో సంతోషంగా ఉండాలని కోరుకున్నట్టు ఆమె తెలిపారు. అమెరికన్ కాన్సులెట్ ప్రతినిధి సైతం బోనాల ఉత్సవాల సందర్భంగా అమ్మవారికి బోనం సమర్పించి మొక్కులు చెల్లించుకున్నారు. ఆలయ అర్చకులు వారిద్దరిని శాలువాతో సత్కరించి అమ్మవారి చీరలను బహకరించారు.
