- దేశంలోనే మూడో స్థానంలో నిలిచిన తెలంగాణ
- జాతీయ స్థాయి కంటే 2.8శాతం అధికం
- సోషియో ఎకనామిక్ సర్వే నివేదికలో వెల్లడి
రాష్ట్ర స్థూల ఉత్పత్తి (జిఎస్‌డిపి) 2022,-23లో 13.1 లక్షల కోట్లు కాగా, 2023,-24 లో 14.6 లక్షల కోట్లకు చేరుకుంది. అంతకు ముందు ఏడాదితో పోల్చితే 11.9 శాతం ఇది పెరిగింది. జాతీయ స్థాయిలో పెరుగుదలను (9.1శాతం) పరిగణనలోకి తీసుకుంటే 2.8శాతం అధికంగా ఉంది. రాష్ట్ర స్థూల ఉత్పత్తిలో తమిళనాడు రాష్ట్రం 14.2 శాతంతో మొదటిస్థానంలో ఉండగా, ఉత్తరప్రదేశ్ 12.8 శాతంతో రెండోస్థానంలో తెలంగాణ మూడో స్థానంలో నిలిచింది. 2023, -24లో స్థూల జాతీయోత్పత్తిలో (జీడిపి)లో తెలంగాణ వాటా 5 శాతంగా ఉందని (సోషియో ఎకనామిక్ ఔట్ లుక్ 2023) నివేదిక తెలిపింది. రాష్ట్ర శాసనసభలో వార్షిక బడ్జెట్ ప్రవేశపెట్టిన సందర్భంగా రాష్ట్ర ఉప ముఖ్యమంత్రి మల్లు భట్టి విక్రమార్క తెలంగాణ సామాజిక, ఆర్థిక నివేదికను విడుదల చేశారు. ఈ ఔట్ లుక్ లో వివిధ రంగాల్లో తాజా పరిస్థితులను వెల్లడించారు.
16 జిల్లాల్లో జిఎస్‌డిపి జాతీయ సగటు కన్నా 14.2 శాతం అధికం
రాష్ట్ర స్థూల ఉత్పత్తి (జీఎస్‌డిపి)లో సేవల రంగం ప్రథమ స్థానంలో దూసుకుపోతుందని ఈ నివేదిక తెలిపింది. ప్రతి ఏడాది మాదిరిగానే తాజాగా ఈ సంవత్సరంలో కూడా సేవల రంగం నుంచే ఆదాయం గణనీయంగా వస్తోందని ఈ నివేదిక పేర్కొంది. ఈ రంగం పరిధిలో ఆసుపత్రులు, రవాణ, స్థిరాస్తి, రెస్టారెంట్లు, హోటళ్లు తదితర సేవలు వస్తాయి. 2023-, 24సంవత్సరంలో సేవల రంగం విలువ గతేడాదితో సరిచూస్తే 65.7 శాతం పెరగడం గమనార్హం. గనులు, క్వారీల నుంచి 18.5 శాతం, వ్యవసాయం, అనుబంధ రంగాల నుంచి 15.8 శాతం, పరిశ్రమల రంగం 19.8 శాతం ఆదాయం వస్తోంది.
అయితే 2021,-22లో వ్యవసాయ రంగం నుంచి 18 శాతం ఆదాయం ఉండగా, అది 2022,-23 సంవత్సరంలో 17 శాతానికి, 2023-,24లో అది 15.8 శాతానికి పడిపోనున్నట్లు ఈ నివేదిక తెలిపింది. పరిశ్రమల రంగం నుంచి 2021-,22లో 19.8 శాతం ఉండగా, 2022-,23 నాటికి 18.8 శాతం, 2023-, 24 నాటికి 18.5 శాతానికి తగ్గనుంది. ఈ హోటళ్లు, రవాణా, బ్యాంకింగ్, ఇన్సూరెన్స్, రియల్ ఎస్టేట్, పబ్లిక్ అడ్మినిస్ట్రేషన్, ఇతర సేవల ద్వారా 65.7 శాతం ఆదాయం రానుంది. అంతకు ముందు సంవత్సరంతో పోల్చితే 1.5 శాతం ఎక్కువగా ఉండటం సంతృప్తినిచ్చే అంశంగా ఈ నివేదిక పేర్కొంది. రాష్ట్రంలోని మొత్తం 33 జిల్లాలు ఉండగా 16 జిల్లాల్లో జిఎస్‌డిపి జాతీయ సగటు కన్నా 14.2 శాతం అధికంగా ఉందని తెలిపింది.
ములుగు జిల్లాలో తలసరి ఆదాయం అతి స్వల్పం…
2014-,15 ఆర్థిక సంవత్సరంలో తలసరి ఆదాయం రూ.1,24,104 కాగా, 2023-,24 సంవత్సరానికి రూ.3,47,299కు పెరిగింది. జాతీయ స్థాయిలో తలసరి ఆదాయంతో పోల్చితే తెలంగాణలో రూ.1.64 లక్షలు అధికమని నివేదిక తెలిపింది. 2022,-23 సంవత్సరంలో రంగారెడ్డి జిల్లాలో తలసరి ఆదాయం రూ.9,46,862 కాగా, హైదరాబాద్ తలసరి ఆదాయం రూ.4,94,033గా నిలిచింది. దేశంలో తలసరి ఆదాయం 2022-,23లో రూ.1,69,496 కాగా, ములుగు జిల్లాలో తలసరి ఆదాయం అతి స్వల్పంగా రూ.6,914గా నమోదయ్యిందని నివేదిక పేర్కొంది.
రాష్ట్రంలో 15 నుంచి -59 సంవత్సరాల మధ్య వయస్సు ఉన్న కార్మికులు 63.4 శాతం
తెలంగాణలోని మొత్తం కార్మికుల్లో 15 నుంచి -59 సంవత్సరాల మధ్య వయస్సు ఉన్నవారు 63.4 శాతం ఉండగా, జాతీయ స్థాయిలో 59.5 శాతంగా ఆ సంఖ్య నమోదయ్యింది. జాతీయ స్థాయిలో పురుష కార్మికుల శాతం 80.2 శాతం కాగా, తెలంగాణలో 77.7 శాతంగా నమోదయ్యింది. తెలంగాణ మహిళా కార్మికుల సంఖ్య గణనీయంగా ఉంది. అందులో నిరుద్యోగుల శాతం పరిశీలిస్తే తెలంగాణలో 2021-,22లో 4.5 శాతం ఉండగా 2022-,23లో 4.6 శాతానికి పెరిగిందని ఈ నివేదిక పేర్కొంది. వ్యవసాయ రంగంలో అత్యధికంగా 47.3 శాతం ఉపాధి లభిస్తుండగా, సేవల రంగంలో 33 శాతం మందికి, పారిశ్రామిక రంగంలో 19.7 శాతం మందికి ఉపాధి అవకాశాలు లభిస్తున్నాయి. వ్యవసా యేతర రంగంలో రెగ్యులర్, నెలవారీ జీతాలు తీసుకునే వారి సంఖ్య గతేడాది లెక్కలు పరిగణనలోకి తీసుకుంటే పెరుగుదల బాగా ఉందని సోషియో ఎకనామిక్ సర్వే పేర్కొంది.
