భక్తుల మనోభావాలను దెబ్బతీసిన వారిని శిక్షించాలి: కేంద్రమంత్రి కిషన్ రెడ్డి
తిరుమల తిరుపతి శ్రీ వేంకటేశ్వర స్వామి లడ్డూ ప్రసాదంలో కల్తీ జరిగిందనే సమాచారం తీవ్ర దిగ్భ్రాంతిని కలిగించిందని కేంద్ర బొగ్గుగనుల శాఖ మంత్రి కిషన్ రెడ్డి తెలిపారు. ఏటా కోట్లాది మంది దర్శించుకునే తిరుపతి వెంకన్న లడ్డూ ప్రసాదాన్ని అపవిత్రం చేయడం అనేది ప్రజల విశ్వాసానికి తూట్లు పొడవడమే అవుతుందన్నారు. ప్రధానంగా హిందువులు, శ్రీవారి భక్తుల మనోభావాలను దెబ్బతీయడమేనని శనివారం నాడు ఒక ప్రకటనలో కిషన్ రెడ్డి వెల్లడించారు.
లడ్డూ ప్రసాదంను కల్తీ చేయడం క్షమార్హం ఎంత మాత్రం కాదన్నారు. శ్రీవారి భక్తుల మనోభావాలను దెబ్బతీసిన నేరస్థులకు తగిన శిక్ష పడాలని ఆయన డిమాండ్ చేశారు. ఈ దిశగా పోలీసు యంత్రాంగం, దర్యాప్తు సంస్థలు ముందుకు వెళ్తాయని తాను ఆశిస్తున్నట్లు కిషన్ రెడ్డి పేర్కొన్నారు. భవిష్యత్తులోనూ ఇలాంటి ఘటనలేవీ పునరావృతం కాకుండా కఠిన చర్యలు చేపట్టాలన్నారు.
దీంతో పాటు తిరుపతిలో అన్య మత ప్రచారం, తిరుమల కొండపైకి మద్యం, మాంసాహారాన్ని తీసుకెళ్లడం, టీటీడీలో అవినీతి అక్రమాలు గత కొన్నేళ్లుగా పతాక శీర్షికలవుతున్నాయని ఆయన ఆవేదన వ్యక్తం చేశారు. సనాతన ధర్మాన్ని, హిందూ ధార్మిక విశ్వాసాలను దెబ్బతీసే కుట్ర గతంలో జరిగిన నేపథ్యంలో వీటన్నింటిపై సమగ్ర దర్యాప్తు జరిపించి, బాధ్యులను శిక్షించి, తిరుమల పవిత్రతను కాపాడి, భక్తుల మనోభావాలను పరిరక్షించే దిశగా చర్యలు తీసుకోవాలని ఆంధ్ర ప్రదేశ్ రాష్ట్ర ప్రభుత్వాన్ని కోరుతున్నట్లు కేంద్రమంత్రి కిషన్ రెడ్డి పేర్కొన్నారు.
