ఇతర రాష్ట్రాల్లో అధ్యయనానికి స్పెషల్ టీం
యూపీఎస్సీ విధానాలపైనా స్టడీ
టీఎస్పీఎస్సీ ప్రక్షాళన చేసేందుకు సీఎం రేవంత్రెడ్డి దృష్టి పెట్టారు. ఇప్పటికే వరుసగా సమీక్షిస్తున్నారు. ఉద్యోగాల భర్తీ అంశంపై గత ప్రభుత్వం ఎదుర్కొన్న విమర్శలు తమపై రావద్దనే కోణంలో నియామకాలపై స్పీడ్ చేస్తున్నారు. అయితే, ప్రస్తుతం టీఎస్పీఎస్సీ పాలకవర్గం చాలా వివాదాల్లో ఉంది. ప్రశ్నాపత్రాల లీకేజీలతో కేసుల పాలైంది. పాలకవర్గం మొత్తం రాజీనామా బాటలో నిలిచారు. ఈ నేపథ్యంలోనే కొత్త చైర్మన్ఎంపికకు రేవంత్ సర్కారు ప్రయత్నాలు మొదలుపెట్టింది. గతంలో ఐఏఎస్కు రాజీనామా చేసి, వీఆర్ఎస్ తీసుకున్న ఆకునూరి మురళికి అవకాశం ఇవ్వనున్నట్లు సమాచారం. ఎన్నికలకు ముందు ఆకునూరి మురళి.. రేవంత్రెడ్డికి కొన్ని విధానపరమైన అంశాల్లో అండగా నిలిచారు. నిరుద్యోగుల తరుపున ఆయన ఉద్యమం చేశారు. ఇప్పుడు రేవంత్కు మద్దతుగా ఉండటంతో.. ఆయన్ను టీఎస్పీఎస్సీ చైర్మన్ గా నియమించే అవకాశాలున్నట్లు తెలుస్తున్నది. ఆయన కూడా గత కొంతకాలంగా విద్య, వైద్య రంగాలపై అధ్యయనం చేస్తున్నారు.
ఆకునూరి మురళి భూపాలపల్లి జిల్లా కలెక్టర్గా ఉన్న సమయంలో కొన్ని అంశాల్లో వివాదస్పదంగా మారారు. ఆయనపై ప్రభుత్వం కక్షపూరితంగా వ్యవహరించడంతో.. వీఆర్ఎస్ తీసుకున్నారు. ఆ తర్వాత పరిణామాల్లో ఆయనకు ఏపీ ప్రభుత్వం పెద్దపీట వేసింది. విద్యా, మౌలిక సదుపాయాల కల్పన సలహాదారుడిగా నియమించింది. ఏపీలో మురళి చేసిన నాడు–నేడు సూపర్ సక్సెస్ అయింది. ఆ తర్వాత ఆయన ఏపీలో సలహాదారుడి పదవికి సైతం రాజీనామా చేసి, రాష్ట్రంలో విద్య, వైద్య రంగాల్లో అధ్యయనం చేశారు. అంతేకాకుండా తెలంగాణ ప్రజాస్వామిక వేదిక చేపట్టిన జాగో తెలంగాణ బస్సు యాత్రలో ఆకునూరి మురళి కీలకంగా వ్యవహరించారు. ప్రస్తుతం కాంగ్రెస్ విజయంలో బ్యాక్ఎండ్గా వ్యవహరించిన ఆయనకు.. టీఎస్పీఎస్సీ బాధ్యతలను అప్పగించేందుకు సిద్ధమవుతున్నట్లు సమాచారం. పాలకమండలి కూర్పు ఈసారి పారదర్శకంగా ఉండాలని సీఎం రేవంత్ భావిస్తున్నారు. దీనిలో భాగంగానే ఆకునూరి మురళికి చైర్మన్గా అవకాశం ఇస్తారని టాక్.
