( టీఎస్ న్యూస్, హైద‌రాబాద్ )
అప్పుడు కాంగ్రెస్.. ఇప్పుడు బీఆర్ఎస్. అటు నుంచి ఇటు.. ఇటు నుంచి అటు నేతలు లైన్ కడుతున్నారు. బీఆర్ఎస్ అధికారంలో ఉన్నప్పుడు నిధుల కోసం అంటూ చెప్పుకుంటూ వెళ్లిన కాంగ్రెస్ఎమ్మెల్యేలు గులాబీ కండువా మార్చుకున్నారు. కానీ, ఇప్పుడు పరిస్థితి సొంత ప్రయోజనాలకు మళ్లింది. పదేండ్లు అధికారంలోఉండి వెనకేసుకున్న భూములను, సంపదను కాపాడుకునేందుకు ఎమ్మెల్యేలు, మాజీ ఎమ్మెల్యేలు కాంగ్రెస్ కండువా కప్పుకునేందుకు సిద్ధమయ్యారు. ఇప్పటికే 26 మంది ఎమ్మెల్యేలు రేవంత్తో రాయబేరాలు సాగిస్తున్నారు. తాజాగా గ్రేటర్ మేయర్ కూడా అదే దారిలో పడ్డారు.
మా భూములు ప్లీజ్
గ్రేటర్ శివారులోని ఎమ్మెల్యేలు వందల ఎకరాల్లో భూములు సంపాదించిన విషయం బహిరంగమే. వాటిలో కొన్ని ప్రభుత్వ భూములు ఉంటే.. మరికొన్ని కబ్జా భూములున్నాయి. ఇదంతా అందరికీ తెలిసిన విషయమే. ఇప్పుడు కాంగ్రెస్ ప్రభుత్వం రావడం, అందులోనూ భూ సంబంధిత అంశాల్లో అపార అనుభవం ఉన్న రేవంత్ రెడ్డి సీఎం కావడంతో.. తమ భూములను రక్షించుకునేందుకు గులాబీ ఎమ్మెల్యేలు రాయబారానికి వెళ్లక తప్పడం లేదు.
* గత ప్రభుత్వంలో మంత్రిగా పని చేసిన ఓ సీనియర్ నేత.. రేవంత్రెడ్డిని సాలే అంటూ సంబోధిస్తూ సవాల్కు దిగిన విషయం తెలిసిందే. కానీ, ప్రభుత్వం మారిన నేపథ్యంలో సదరు ఎమ్మెల్యేకు చెందిన మెడికల్ కాలేజీ నిర్మించిన భూమి వ్యవహారంలో సీఎం రేవంత్ అధికారులకు సూచనలిచ్చారు. అంతే.. ఇప్పుడు సదరు ఎమ్మెల్యే ఉన్న ఫళంగా మాట మార్చారు. రేవంత్.. తాను టీడీపీలో దోస్తులమే అంటూ తీయని మాటలను పలుకుతున్నారు.
* మరో శివారు ఎమ్మెల్యే కూడా రాజేంద్రనగర్ పరిధిలోని 30 ఎకరాల భూమి కోసం రేవంత్ దగ్గరకు చేరేందుకు సిద్ధమయ్యాడు. దాదాపు ఇందులో 14 ఎకరాలు ప్రభుత్వ భూమి ఉండటంతో పాటుగా కొంత లిటిగేషన్లో ఉన్న భూమిని తన పేరుమీదకెక్కించుకున్నాడు. ఇప్పుడు ఈ వ్యవహారం అంతా తెలిసిన రేవంత్రెడ్డి.. ఎలాగైనా దీనిపై ఫోకస్ చేస్తారనే భయంతో రేవంత్ దగ్గరకు చేరేందుకు రాయబేరాలు సాగిస్తున్నారు.
* పటాన్చెరు దగ్గర చెరువుకు సంబంధించిన 8 ఎకరాలను తన ఖాతాలో వేసుకున్న ఓ బీఆర్ఎస్ ఎమ్మెల్యే కూడా కాంగ్రెస్లో చేరేందుకు ఓ సీనియర్ నాయకుడి దగ్గరకు పరుగులు పెడుతున్నాడు. తాజాగా మేయర్ విజయలక్ష్మీ కూడా బంజారాహిల్స్లో నివాస స్థలాన్ని ప్రభుత్వం నుంచి అతి తక్కువ ధరకు కొనుగోలు చేసిన విషయం తెలిసిందే. కేకే వారసులకు ఇక్కడ భూమి ఇచ్చారు. ఇప్పుడు ఆ భూమిని కాపాడుకునేందుకు సీఎం రేవంత్ను కలిసి, పార్టీలో చేరేందుకు ప్రయత్నాలు చేస్తున్నట్లు ప్రచారం జరుగుతున్నది.
