తెలంగాణ రాజకీయాలు ఊహించని మలుపులు తిరుగుతున్నాయి.. సీఎం రేవంత్ రెడ్డిపై ఎన్ ఫోర్స్ మెంట్ డైరెక్టరేట్ కు ఫిర్యాదు వెళ్లింది. రేవంత్ రెడ్డిపై వచ్చిన ఫిర్యాదును ఈడీ స్వీకరించడం సంచలనంగా మారింది. సీఎం రేవంత్ రెడ్డిపై వచ్చిన ఫిర్యాదుపై ఈడీ దర్యాప్తు చేస్తే కీలక పరిణామాలు జరుగుతాయనే చర్చ సాగుతోంది. ఈడీ కేసులో రేవంత్ రెడ్డి బుక్ కావడం ఖాయమని బీఆర్ఎస్ నేతలు చెబుతున్నారు.
ఫిర్యాదు ఎందుకంటే..?
ఇటీవల అమెరికాలో పర్యటించిన సీఎం రేవంత్ రెడ్డి బృందం.. తెలంగాణలో పెట్టుబడులకు సంబంధించి స్వచ్ బయో సంస్థతో రాష్ట్రంలో పెట్టుబడులకు ఒప్పందం చేసుకున్నది. ఈ డీల్ పై పెద్ద వివాదం సాగింది. స్వచ్ బయో కంపెనీకి సీఎం రేవంత్ రెడ్డి సోదరుడు ఎనుముల జగదీశ్ రెడ్డి డైరెక్టర్ గా ఉన్నారని, ఇతర డైరెక్టర్లు కూడా రేవంత్ రెడ్డి అనుచరులనే విమర్శలు వచ్చాయి.
ఆ కంపెనీ కూడా నెల రోజుల క్రితమే ఏర్పాటైందని బీఆర్ఎస్ నేతలు ఆరోపించారు. ఇందుకు సంబంధించి కొన్ని ఆధారాలు కూడా విడుదల చేశారు. స్వచ్ బయో కంపెనీపై జరిగిన ఒప్పందంపై ఈడీ కేంద్ర కార్యాలయం ఢిల్లీలో బీఆర్ఎస్ నేత మన్నె క్రిశాంక్ ఇటీవల ఫిర్యాదు చేశారు. ముఖ్యమంత్రి రేవంత్ రెడ్డి, వారి తమ్ముడు జగదీశ్ రెడ్డిపై విచారణ జరిపించాలని ఆయన ఈడీకి చేసిన ఫిర్యాదులో పేర్కొన్నారు. ఈ ఫిర్యాదును ఈడీ స్వీకరించింది.
ఈడీకి అన్ని ఆధారాలు ఇచ్చానని క్రిశాంక్ తెలిపారు.. ఆ సంస్థకు డైరెక్టర్ గా ఉన్న జగదీశ్ రెడ్డితో పాటు ముఖ్యమంత్రిపై విచారణ చేయాలని కోరినట్లు ఆయన మీడియాకు చెప్పారు. తన ఫిర్యాదును ఈడీ అధికారులు విచారణకు స్వీకరించారని పేర్కొన్నారు. దీంతో, ఈడీ రంగం లోకి దిగితే ఎలాంటి పరిణామాలు జరగ బోతాయన్న దానిపై ఉత్కంఠ నెలకొంది.
