-
రైళ్లలో సమ్మర్‌ సీజన్ ఎఫెక్ట్
-
ప్రయాణికులతో భోగీలు బిజీ
-
ప్రత్యేక రైలు సర్వీసులు పొడిగించిన అధికారులు
ముద్ర ఏపీః వేసవి కాలం వచ్చిందంటే చాలు స్కూళ్ళు, కాలేజీలు సెలవులు, దీంతో ఫ్యామిలీస్‌ అందరూ కలిసి సమ్మర్‌ ట్రిప్స్‌ వేస్తుంటారు. ఇక రైళ్లల్లో ప్రయాణికుల రద్దీ పెరిగిపోతుంది. సెలవుల నేపథ్యంలో విహారయాత్రలకు వెళ్లేవారితో పాటు.. సొంతూళ్లకు ప్రయాణం కట్టే ప్యాసింజర్లతో రైలు బోగీలు కిటికిటలాడనున్నాయి. ఈ నేపథ్యంలో ఇప్పటికే పలు ప్రత్యేక రైలు సర్వీసులను పొడిగించిన దక్షిణమధ్య రైల్వే.. తాజాగా మరికొన్ని ప్రత్యేక రైలు సర్వీసులను కూడా పొడిగించింది. ముఖ్యంగా కృష్ణా జిల్లా నుంచి తిరుపతికి వెళ్లాలనుకునే వారికి శుభవార్త చెప్పింది.
వేసవి రద్దీ కారణంగా ప్రయాణికుల సౌలభ్యం కోసం విజయవాడ మీదుగా నడిచే హిసార్ , తిరుపతి స్పెషల్ రైళ్లను పొడిగించినట్లు దక్షిణ మధ్య రైల్వే తెలిపింది. 09715 తో హిసార్, తిరుపతి మధ్య సౌత్ సెంట్రల్ రైల్వే ప్రత్యేక రైలును నడుపుతోంది. ఈ స్పెషల్ ట్రైన్ సర్వీస్ ఏప్రిల్ 6 నుంచి మే 25 వరకు ప్రతి శనివారం నడవనుంది. అలాగే 09716తో తిరుపతి, హిసార్ మధ్య మరో స్పెషల్ ట్రైన్ నడుస్తోంది. ఈ రైలును ఈ నెల 9 నుంచి మే 28 వరకు ప్రతి మంగళవారం నడుపుతామని దక్షిణ మధ్య రైల్వే్ తెలిపింది. ఈ స్పెషల్ ట్రైన్ విజయవాడ, ఉజ్జయినితో పాటు ప్రధాన స్టేషన్లలో ఆగనుంది.
అంతేకాక హౌరా – యశ్వంత్ పూర్ మధ్య వారంలో ఒకరోజు ఏసీ స్పెషల్ ట్రైన్ నడుపుతున్నట్లు వాల్తేర్ డివిజన్ అధికారి ఏకే త్రిపాఠి తెలిపారు. 02863 నంబరుతో హౌరా – యశ్వంత్ పూర్ మధ్య వీక్లీ ఏసీ స్పెషల్ ట్రైన్ నడుపుతున్నట్లు వెల్లడించారు. ఈ ప్రత్యేక రైలు ఈ ఏప్రిల్4,11 తేదీల్లో హౌరాలో మధ్యాహ్నం 12.40 గంటలకు ప్రారంభమై.. మరుసటి రోజు రాత్రికి 12.15 గంటలకు యశ్వంత్ పూర్ చేరుకుంటుంది. మధ్యలో విజయనగరం, విజయవాడ, రేణిగుంట స్టేషన్లలో ఆగనుంది. యశ్వంత్‌పూర్ నుంచి తిరిగి హౌరాకు 6,13 తేదీల్లో అందుబాటులో ఉండనుంది.
ఇక రైల్వే అధికారులు ప్రయాణికులకు ఎలాంటి ఇబ్బందులు కలగకుండా ఇలా ట్రైన్‌లు పెంచడం పై పలువురు ఆనందం వ్యక్తం చేస్తున్నారు. దీనివల్ల ఇటు సెంట్రల్ గవర్నమెంట్‌కి లాభం అదేవిధంగా ప్రయాణికులకు కూడా ఎటువంటి ఇబ్బంది కలుగదు. ఇకపోతే ఈ స్పెషల్ ట్రైన్స్‌ కేవలం పై ఉన్న తేదీలలో మాత్రమే నడుస్తాయా లేక తరువాత కూడా అందుబాటులో ఉంటాయా అన్నది చూడాలి.
